現在百物騰貴,在地舖買一個手袋動輒也要過千元,但在樓上舖購買只需數百元而已;一直都有自家廠房並出口手袋往歐洲的Wellshare Industrial Limited,近幾個月開設一間命名為Neal的樓上舖,務求將生意變得大眾化及多些顧客能購買較便宜的貨品。
自設廠房
Wellshare於1987年成立,特設自家廠房,主要為多個歐洲及美國的國際品牌生產手袋,負責人John表示:「我哋而家想擴展吓業務,所以創立咗Neal呢個自家品牌,多數都係由香港年輕設計師設計,同時我哋希望喺而家咁貴嘅商品社會,可以有多一個價錢相宜同品質好嘅選擇俾大家!」
任摸任試
現在只是剛剛開業,多是靠熟客介紹其他客人來購買,「好多人喺呢區都只係知香工有袋賣,我哋都好想俾啲客知道除咗香工,呢邊都有好多樓上舖,都有袋賣架!同埋本身我哋係做網上商店,但網上有個唔好處就係只得睇相冇實物摸,好多人都要有實在嘅感覺,鍾意有得摸吓,試吓上身咁!」John洞悉趨勢地說。
特設訂造服務
問到John跟其他店舖有何不同,他自信地說:「我哋呢度有埋售後服務,喺呢度買嘅袋都有保養!同埋我哋呢度有得訂造服務,可以 根據而家嘅款去改皮料同顏色,好似仿皮轉尼龍或者其他料都得。另外,客人可以畫低自己想擁有嘅袋款,可行嘅話我哋都會去做架!」很少售賣手袋的店舖有此服務,這樣Neal Shop一定愈來愈多顧客。